【特訊】周三（十三日）凌西甲，貝迪斯主場以2比1擊敗艾爾切，加上第6位切爾達輸波，得以提早2輪穩佔聯賽第5位，獲得下屆歐冠入場券，亦係貝迪斯相隔21年再次可以出戰這項大賽，意味「脫魔重生」的巴西翼鋒安東尼馬菲奧斯有望倒戈曼聯。

　西甲同英超球隊今季歐洲賽成績出色，同樣獲得額外1個下屆歐冠參賽席位，賽前巴塞隆拿、皇馬、維拉利爾、馬體會已穩奪歐冠資格，貝迪斯為搭上歐冠尾班車，今仗表現非常落力，開賽9分鐘，由前鋒古祖靴南迪斯遠射地波入網打開紀錄。要搶分護級的艾爾切亦不甘示弱，靠希陀科特入波扳平，上半場補，艾爾切曾經入波，但被判無效。

　換邊後3分鐘，艾爾切後衛佩特洛特粗野飛剷安東尼馬菲奧斯，被球證直接出示紅牌趕出場，成為賽事轉捩點，貝迪斯踢多1人控制大局，68分鐘中場柏保路科奴斯遠射入世界波奠定2比1勝局。

　貝迪斯贏波之外，爭歐冠入場券對手切爾達主場以2比3不敵利雲特，令貝迪斯拉開距離至7分，剩下2輪聯賽肯定以第5位過終點，繼2005/06年球季之後，終於重返歐冠，該屆貝迪斯分組賽出局。

　另外，昨晨西甲，馬體會作客二比一破奧沙辛拿。◇