【特訊】周三（31日）凌晨非國盃分組賽，C組烏干達慘遇「滅門之災」，一場波用盡3個龍門下以1比3不敵尼日利亞，包尾出局，而尼日利亞、突尼斯同坦桑尼亞就攜手晉級16強。

　烏干達今場非勝不可，但開波不久門將安恩高就腳踝受傷，雖然他繼續頂住，但半場落後0比1下，中場休息亦要退下火線。後備門將沙林上陣10分鐘就出事，他衝出禁區外用手阻擋域陀奧森漢射門，難逃紅牌出場厄運。3號門將艾利安斯上陣後，8分鐘內就連失2球，烏干達尾段雖然破蛋，但仍然以1比3落敗。

　同組另一場，突尼斯1比1打和坦桑尼亞，保住次名出線資格，他們在16強將會對著馬里，至於坦桑尼亞亦鎖定成為其中一支「最佳第3名」，16強會挑戰東道主摩洛哥。D組方面，塞內加爾同剛果民主共和國分別大勝3比0，齊齊晉級淘汰賽。◇