今年係跑馬地聖瑪加利大堂迎來100周年里程碑，堂區邀請教友兼資深演員劉松仁作出首次心靈分享，以「心靈之約」為主題，罕有剖白自身複雜成長背景，以及佢與亡母嘅相處點滴。

　片中見劉松仁細說其複雜童年家庭背景，指父親喺40年代末由上海移居香港，當時已擁有兩位太太，而劉松仁稱呼父親第二任太太為「阿姨」，劉松仁於家中排行第五，有3位親哥哥及一位阿姨生嘅哥哥，家庭成員關係錯綜複雜。

　劉松仁透露佢哋一直「掛名」係潮州人，直到自己50歲嗰年被堂伯告知，家族血統係客家人，只係佢哋四代前遷居汕頭，劉松仁又指由於爸爸有兩個老婆，佢呢邊係細房，所以佢媽媽好冇安全感，更將所有安全感放晒喺劉松仁身上，對劉松仁管教好嚴厲，嚴厲到不近人情嘅地步，但係當劉松仁講到少年叛逆時期，當時於加拿大求學，覺得當地人比較個人主義，難識到真正朋友，佢喺未告知媽媽嘅情況下突然返港，本來佢心驚膽顫回家，未想到媽媽不發一言，亦未有追問原因。

　劉松仁有感回港後要搵工，希望做到啲成績，佢就毅然報考麗的電視藝員訓練班，從而踏上演藝之路，媽媽亦只叮囑其唔好學壞，劉松仁回想入行後，唔想媽媽辛苦等佢，只懂用自己嘅方法作出回應，不時板著臉或者冷漠回應媽媽，令母子關係變得冷漠，足足維持咗長達30年，其母一直遷就劉松仁，默默承受及包容，令劉松仁後嚟充滿愧疚。

　劉松仁亦曾作出改變，希望修補母子關係，成為媽媽嘅依靠，譬如擁抱及行街拖手，又花多啲時間陪伴媽媽，劉松仁坦言媽媽一開頭好唔慣，提到有次佢喺茶餐廳同朋友傾偈，當媽媽見到佢哋，竟然怕失禮阿仔而離開，劉松仁直言公開分享呢段經歷，除咗療癒自我「告解」，亦希望警醒大家快樂係經歷奮鬥及爭取去換嚟。◇