「體驗職場百態，感受工作的價值與意義」。無綫全新綜藝節目《一日打工限定》，集合15名藝人以第一身角度帶觀眾了解香港各行各業的「另類職人」，藉此展現行業中職人專業精神，節目逢周一至周五翡翠台播映。

　周二晚（20日）第四集登場的，是試做點心師傅的姚子羚；為了打好份工，姚子羚提前一天抵達打工現場，跟曾師傅學整燒賣及炸鳳爪等，翌日又要晨咁早凌晨四點多抵達點心工場，準備腸粉、蝦餃蒸排骨、山竹牛肉及煎堆等大量點心，相當忙碌！點心師傅甫與子羚碰面，便與子羚約法三章，指出點心師傅四大辛苦位：「又要早起身、又要夠力、又污糟邋遢、又濕手濕腳喎。」又搞笑恐嚇子羚謂：「最緊要記憶力，講兩次我就要問候你。」

　雖然曾師傅算是好聲好氣，但子羚被訓話時全程明顯扁嘴兼眼濕濕，事後子羚直認很挫敗：「你會覺得點解我連一隻完整嘅蝦餃都包唔到，師傅叫我去抖下，其實我唔係好想去抖，我覺得個感覺有啲似我拍劇，會愈拍愈有Energy，一停咗落來，就會唔知自己做乜咁。」不過子羚很快便重拾鬥志埋首工作，結果成功翻盤獲師傅讚賞：「第一次做，我講真我都做唔到咁靚」。事後子羚謙稱全靠演員需要具備模仿能力，是次學師才能薄有成績。子羚說：「真係落手去做，係比你想像中難好多，每個step都冇得偷懶，當你錯咗一個步驟，你就要由頭做過。」曾見子羚不斷「輸咗又起番身」，亦忍不住正評子羚謂：「喺短短嘅時間入面，你要完成咁多個點心係唔容易嘅事。」◇