吳業坤昨(五)日接受薛家燕、范振鋒、思敏節目訪問宣傳新歌《愛情求生案內書》，家燕姐大讚吳業坤多才多藝，識彈結他、仲做埋歌曲MV監製、稍後更拍埋劇集，而最令家燕姐激讚吳業坤苦練空手道五年，最近出戰全運會香港選拔賽奪第四位，吳業坤感謝完家燕姐讚賞，隨即搞笑地問家燕姐攞利是，家燕姐就哈哈大笑沒理會他。

　吳業坤表示屈指一算十五年前參選「超級巨星」歌唱比賽，時間過得好快：「自細鍾意唱K，咩都唔叻，唯一同學仔會讚的就係唱K。嗰時教會一百元教四堂唱歌，好抵，因為咁入咗教會。之後用咗二百元買了一把木結他，夢想就係由呢把木結他，每一小步開始。」

　家燕姐讚他聲底好靚，轉假音又好靚，阿范搞笑說：「即係好假，哈哈！」吳業坤即笑言「夠假」全靠自小喜歡唱周杰倫歌曲，從而訓練出假音技巧，他坦言周杰倫來港搞簽名會時，他試過排隊攞簽名。

　節目中，家燕姐坦言關心他的「家庭計劃」，他表示與太太商量過生育問題，只是暫時好多工作，同埋：「要財務自由先，雖然暫時財務尚算OK。同埋我哋要諗清楚會否移居日本。」

　再談到吳業坤四月十八日生日要開工拍劇，吳業坤即刻九秒九精靈地再望著家燕姐逗生日利是，家燕姐大笑說：「佢話生日就望住我，哈哈！」吳業坤爆笑地纏著家燕姐唔放：「家燕姐，而家可以用手機支付，唔好話冇現金。」家燕姐笑到飆眼水。

　吳業坤向家燕姐追討利是三、四次都不成功，原來家燕姐早有準備，早已秘密地把兩封利是「攝」在背後，在節目完結大合照時，突然取出兩封大利是，送給吳業坤祝賀生日及恭喜他在全運會香港選拔賽奪第四位，吳業坤驚喜又意外得尖叫，開心大叫：「得到家燕姐祝福利是，好開心呀，仲要係雙封！我一定會好好收藏！」◇